Kesari WeeklyKesari

കവിത

സ്വാമി അയ്യപ്പാ!!--അമ്പലപ്പുഴ രാജഗോപാല്‍

on 06 January 2018

മകരസംക്രമ,ഗീതമെഴുതും-

സവിധമെന്റെ മനോ-

മുകുരമാകെ നിറഞ്ഞുനില്പൂ ശരണമയ്യപ്പാ

ഹരിഹരാത്മജ മഹിമ നിറയും-

ഭൂവനകാന്തിയിതില്‍-

അരിയ ദുഃഖ സമുദ്രമാകെയകന്നുപോകുന്നു.

വികലമായ വിചാരവഹ്നിയി-

ലൊഴുകി വീഴാതെ

വിമലസ്‌നേഹവിലോലകാന്തിയി-

ലഭയമയ്യപ്പാ!

തരിക നിന്റെ കൃപാതിരേക, മി-

തെന്റെ വഴിയാകെ

ചൊരിയുമെങ്കിലെനിയ്ക്കതില്‍പ്പര-

മെന്തു സൗഭാഗ്യം!

അരിയെവെന്നുവിളിങ്ങി ഗിരിയുടെ-

മുകളില്‍ വാഴും നീ-

ഹരിഹരാത്മജ, നഭയവരദന്‍-

ശരണമയ്യപ്പാ!

ഭൂവനപാലകനായ നിന്നുടെ-

പദതളിര്‍ദ്വയമെന്‍-

ഹൃദയമാകെ നിറഞ്ഞിടുന്നതി-

ലഭയമയ്യപ്പാ!

പലതരത്തിലുഴന്നിടും നര-

നിവിടെയെത്തുമ്പോള്‍

ഒരുതരത്തിലുമില്ല,ഭേദം-

സ്വാമി സവിധത്തില്‍

പറയുവാനെളുതല്ല നിന്റെ-

മഹത്വമേതൊന്നും;

പറയുവോര്‍ക്കുവരുന്നുകീര്‍ത്തി,യ-

തെന്നപോല്‍ മുക്തി

അറിയുമെങ്കി,ലഹന്തവിട്ടു-

ജയിച്ചിടും; ''സ്വാമീ-

ശരണ''മെന്നു നിരന്തരം

കരുതുന്നു അയ്യപ്പാ!

ഹരിയുമതുപോല്‍ ഹരനുമാകെ-

വിളങ്ങി നില്‍ക്കുന്നു

മകരസംക്രമസന്ധ്യതന്‍ ''പ്രഭ'' -

മഹിയിലൊഴുകുന്നു.

അതിലെഴുന്നനുഭൂതി, ആത്മ-

സുഷുപ്തിയതുനിത്യം-

തരിക 'കലിയുഗവരദ' നയ്യ-

നെനിയ്ക്കു നീ നിത്യം.

വ്യഥകളാകെയകന്നു 'നാമ-

സ്മൃതിയിലലിയുമ്പോള്‍-

മഹിതമാം ശബരീശ ഗീതക-

മധുരമൊഴുകുന്നു.

തങ്കസൂര്യപ്രഭയില്‍ നിന്‍തിരു-

സന്നിധാനത്തില്‍-

സംക്രമാര്‍ച്ചനകണ്ടു കോള്‍മയിര്‍-

കൊണ്ടു നില്‍ക്കുന്നു.

തിങ്കള്‍വദനാ, ശങ്കരാത്മജ

സ്വാമി അയ്യപ്പാ, മകര-

സംക്രമാവൃതസന്ധ്യയില്‍-

തരികേറെ സുകൃതങ്ങള്‍!

വന്‍പുലിയ്ക്കുപുറത്തു വ-

ന്നണയുന്ന ഭഗവാനേ

എന്‍മനസ്സിനകത്തു വന്നു-

നിറഞ്ഞുനില്പവനേ!

കളഭവും ഘൃതമെന്നപോല്‍-

പനിനീരുമഭിഷേകം

ഒളിപരന്നിടുമെങ്ങു മീദൃശ-

മെന്റെ സൗഭാഗ്യം!

ഭസ്മ, പുഷ്പ, സുഗന്ധ ധൂളി-

നിറഞ്ഞസന്നിധിയില്‍,

ധൂപ ദീപ നിവേദ്യമെങ്ങു-

മിയന്ന തിരുനടയില്‍

പുണ്യ-പാപച്ചുമടുമായി-

വരുന്ന ശതകോടി-

സഞ്ചയങ്ങള്‍ വിളിപ്പു-

''സ്വാമീ ശരണമയ്യപ്പാ!!''

ശോക,താപ,വിഷാദചിന്തയി-

ലാഴ്ന്നിടാതെ, കൃപാ-

പൂര്‍ണ്ണനായമരുന്ന നിന്‍തിരു-

മുന്നിലെത്തീ ഞാന്‍

ലോകമാകെ നിറഞ്ഞ ഭക്തിയില്‍

വാഴ്‌വതിന്നു മഹാ-

യോഗ പട്ടാംബര വിഭൂഷിത

പൂര്‍ണ്ണ പൂജിതനേ

പ്രേമപൂരിതമായ പുണ്യ-

ഗുണാബ്ധിതന്നില്‍ മഹാ-

ധ്യാനലീനനവന്‍ ജഗദ് പ്രഭൂ

സ്വാമി അയ്യപ്പാ!!

നിങ്ങളുടെ അഭിപ്രായങ്ങള്‍

അവഹേളനപരവും വ്യക്തിപരമായ അധിക്ഷേപങ്ങളും അശ്‌ളീല പദപ്രയോഗങ്ങളും ദയവായി ഒഴിവാക്കുക.

0 Comments